МЭНДЧИЛГЭЭ

Эргэх дөрвөн улирал, он цагийн хэлхээс болсон нэгэн жаранд нийслэл  хотынхоо төвлөрсөн дулаан хангамж, дулааны эрчим хүчийг тасралтгүй найдвартай хангах эрхэм зорилгын дор “Улаанбаатар дулааны сүлжээ” ТӨХК-ийн халуун ам бүл 60-н жилийнхээ ойтойгоо учран золгоод байна.

Тэртээх 1959 оны 9 сарын 9-нд БНМАУ-ын Сайд нарын зөвлөлийн 367-р тогтоолоор Улаанбаатар хотын дулаацуулах байгууламжийн ашиглалт засварыг хариуцах үүрэгтэй Дулааны шугам сүлжээний ашиглалтын газрыг Төв цахилгаан комбинатын харьяанд аж ахуйн тооцооны үндсэн дээр байгуулан ажиллуулах шийдвэр гарснаар Монгол улсад төвлөрсөн дулаан хангамжийн систем үүсэн хөгжих суурь нь тавигдсан түүхтэй.

Анхны тулгын чулуугаа тавьж байсан анхдагчид маань 9 ажилтан, 10 км урт шугам, 80 орчим хэрэглэгчтэйгээр ажлын гараагаа эхлүүлж байсан бол эдүгээ Улаанбаатар хотын төвлөрсөн дулаан хангамжийн системд холбогдсон 2760 аж ахуйн гэрээтэй хэрэглэгч, ОСНААУГ-ны харьяа Хэрэглэгчдэд үйлчлэх төвүүдийн 9000 гаруй барилга обьектын халаалт, 379.5 км урттай 13 магистраль шугам, насосны 8 станц, дулаан дамжуулах 2 төвөөр дамжуулан жилийн дөрвөн улирлын турш халаалт, хэрэглээний халуун усаар хэрэглэгчдийг тасралтгүй найдвартай ханган ажиллаж байна.

Сүүлийн жилүүдэд нийслэл хотод барилгажилт эрчимтэй явагдаж байгаатай уялдуулан жилд дунджаар 100-150 Гкал/ц-ийн ачаалал бүхий 200 орчим барилгыг төвлөрсөн дулаанд холбон ажиллаж байгаа бөгөөд дулаан түгээлт жилдээ 3-8 хувиар өсч байна. Мөн манай хамт олон нийслэл хот төдийгүй Монгол улсынхаа 21 аймгийн төвүүдийн дулаан хангамжийн горимын тооцоо, тохируулга зүгшрүүлгийг өөрийн зардлаар тогтмол хийж мэргэжил арга зүйн зөвлөгөөг өгч ирлээ.

“Улаанбаатар дулааны сүлжээ” ТӨХК нь Монгол Улсын Засгийн газрын 2017 оны 9 дүгээр сарын 13-ны 258-р тогтоолын хэрэгжилтийг хангаж Нийслэлийн агаар, орчны бохирдлыг бууруулах хөтөлбөрт ажлын хүрээнд Улаанбаатар хотод ажиллаж буй бага, дунд чадлын усан халаалтын зуухнуудыг зогсоож төвлөрсөн дулаанд холбох тооцоо, судалгааны ажлыг тус компанийн инженер, инженер техникийн ажилтнууд  хийж гүйцэтгэн ажлын эзэлхүүнийг багцалж Улсын төсвийн хөрөнгө оруулалтаар төв шугамын өргөтгөл шинэчлэлт, дулаан дамжуулах төвийн тоноглол, шугам угсралт зэрэг цогц ажлуудыг хийж гүйцэтгэж байна.

Монголын Үндэсний Худалдаа Аж Үйлдвэрийн Танхим (МҮХАҮТ), Монгол Улсын Засгийн газраас хамтран жил бүр улс орны нийгэм, эдийн засаг, бизнесийн хөгжилд жинтэй хувь нэмэр оруулсан “ТОП-100” аж ахуйн нэгжээр 17 жил тасралтгүй шалгарчээ.

Эрчим хүчний салбарт манлайлагч нь болж яваа манай байгууллагын сэтгэл, зүтгэл шингэсэн бүтээн байгуулалт, ажил хөдөлмөрийн талбарт ямагт хамт байдаг хэрэглэгч, хамтран ажилладаг аж ахуйн нэгж, төрийн болон төрийн бус байгууллагууддаа талархал илэрхийлье.

Монгол улсын зүрх нь болсон нийслэл хотынхоо иргэд, хэрэглэгчдийг дулааны эрчим хүчээр найдвартай тасралтгүй хангаж яваа  үе, үеийн удирдлага ахмадууд, инженер, инженер техникийн ажилтан албан хаагчиддаа Монгол улсад төвлөрсөн дулаан хангамж үүсч “Улаанбаатар дулааны сүлжээ” ТӨХК  байгуулагдсаны 60-н жилийн ойн мэндийг та бүхэндээ өргөн дэвшүүлье.